In de nos grôs sciençous, écrivou brâment cognu, é dit, è y é dje bïn grant : " lai dyierre ât lou frut d'lai crouy'tè des hannes. "

    Dains nos v'laidges, d'lai sen des frontieres di paiyis, an é s'vent poyu, dains lai cheûte des siecles, vérifiaie c't'aivisâle. Dâs Arioviste djainqu'â l'Adolf les airmèes aint péssè chu nos campaignes en aippoutchaint yot'coulainnèe de criyâs. Djanmais nos véyes dgens n'aint aippiâdgi lai dyierre, ès saivïnt bïn poquoi.

    I aî dempie quèques vaîdyes seûv'nis de Nôvembre 44, mains i aî oyu tchie nôs brâment de raicontes de totes les sôtches, qu'en dyïnt prou grant : lai dyierre de Trente Onnaies et les Ch'vèdes qu'aint tot décombrè poichi, qu'aint maissaicrè tot c'qu'ès poyïnt : les dgens et les bétes, ran n'ât démoèrè ! Â v'laidge doues faimilles aint churvétçhu, an n'sait pouè c'ment, pai miraitçhe po chur !

    Et peus, tiaind qu'les cosaques et les kaiserliks sont v'nis dains l'câre po l'premie siedge de Béfoûe, ès s'sont avoinès chu les hôtâs : ès engoulïnt tot c'qu'ès trôvïnt, ès bâffrïnt et treûyïnt c'ment des savaidges. Dâdon l'huvie ât aivu aiffreû : â v'laidge an é condut vïnte-ché vois â ceim'tére en quèques mois ; lai faim, lou fraid et lai mijére moûechnïnt sains râte.

    En 70 les Prussiens leudgïnt âchi dains les v'laidges âtouè d'Béfoûe . Es n'aint pouè trou borriâdè les dgens, mains ès aint aippoutchè enne tèrribye trïnnèe : les boussottes ! çoli embartçhait tote enne mâjon en ran d'temps ! Mes airrie-airrie-grants-poirants sont paitchis dïnnai dains lai meinme s'nainne, en léchaint yot'féye oûerfenatte.

    Et peus, lou dous d'Ô 14, an é craiyu vétçhie ïn peut sondge : quasi tus les hannes et tus les tchouvâs sont paitchis, â moitan d'lai moûechon. Lou v'laidge était veûde, les fannes et les véyes que d'moérïnt étïnt c'ment fris pai lou fûe di cie. Lai grant-mére m'é contè qu'ès n'saivïnt pus les djouès d'lai s'nainne : tot d'ïn côp, en boussaint lai tchairratte po allaie â béné, réchâvaie sai bûe, èlle s'ât aivisè qu'c'était dûemoinne !

    Mitnint an porait djasaie de 1939-44 : tot poitchot lai poûertè, lai paivou, lai moûe, " lou tchaigrïn et lai pidie " c'ment qu'an é dit…I m'révije d'lai grôsse étâle de l'onçhiat lavousqu'è n'y aivait pus que trâs vaitches… Des hôtâs aint breûlè, ïn véjïn ât môtche è Dachau lai vaye de Nâ 44, en lai rive de not'bôs 27 préjenies de Béfoûe sont aivus fusillès … Mains lai djoûe, casèe pai lai fûete des nazis et d'yot' étçhipe de crevoures, ât réchtè brâment grant dains les tiûeres…

    Lai biâtè d'lai Paix !… ç'ât chutot çoli qu' n'fât pouè rebiaie dains ci monde que nôs djase todje de dyierres ! Po lai néchaince de c't'aifnat Djésus, nôs porïns tchaintaie encouè et encouè : " Lai paix, lai paix pairmé les hannes, lai paix, l'aimouè et lai libretè, nôs sons è Nâ ! "

    " Eh bïn, Climène, vote Maidyi et peus ses dous bessenots ne sont dyère démoérès ci côp-ci. Meinme que vot'Madyi n'é pe aivu lou temps de me dire bondjoué : i n'en seus pe trou contente.

- Es ne sont crébïn dyère démoérès, mains çât prou, Madeleinne. Ç'ât encoué pus pé que lai grippe de L'Ulysse. I en airôs bïn trâs livres è raicontaie che i v'lôs, mains an ne peut pe todje dire.

- Poétchaint, Climène, dous che bés boûebats, i en vorôs bïn enne dozainne.

- An voit bïn, Madeleinne, que vôs n'étïns pe lai tiaind qu'i ai fait des bugnots de Carimentran. I en aivôs fait piein ïn grôs penie è bue. Eh bïn, vôs me crairèz che vôs v'lèz, ès se sont reyevès lai neût, èls aint aivâlè è lai tieûjeune, èls en aint maindgie ïn grôs moncé, ès sont r'montès â lé, et peus â bout d'ïn môment, èls aint tot retchaimpè dains les lessues. Tiu ç'ât qu'é tot relaivè. Ç'ât lai Climène !

- Mains, Climène, tos les effants se f'sant mâ y ventre daivô des bugnots. È fât saivoi yos poidgenaie. Els aint lou temps d'aivoi l'aidge de râjon.

- È vôs ât aîjie de dire, Madeleinne, mains ce n'ât pe tot. Lou lendemain, lou Patrick é voyu montaie chu lou tchouvâ di Milot l'Elusai. Tot allait bïn, è se r'drassait c'ment ïn pouille chu enne bouse, mains voilai qu'èl é trovè que lou Bijou n'ollait pe prou vite, èl y tchaimpe des grants côps de tolons dains les côtes. Voilai lou Bijou que n'y compregnait ran, que yeve lou tiu et peus lou Patrick poi tiere. I aî craiyu qu'èl était tyuè, mains è se redrosse c'ment ïn seudge et peus è s'bote è breûyie : " I veus r'montaie chu lou Bijou, Milot, i veus remontaie, ou bïn i veus lou dire è lai manman ! "

- D'ci côp, i l'aî pris pai lou brais, i lu é r'toénè ïn " tire t'en d'lai " et peus i l'aî raimoénè è l'hôtâ. Ci mâlerie mormôton m'é tot dit, è m'é aipp'lèe cancoire, greubeusse, sourciere et peus " pineupe ". I me pense que ç'ât yun de ces mouts de Pairis que ne v'lant ran dire !

- Aiprés, ç'ât aivu lou toué de l'Albain de faire des sïnnes. Vôs saites c'ment qu'è y aivait de lai nadge. Lou voilai que s'bote è tçhissie chu lai yaice di tch'mïn daivô ses sobots, qu'èl en é ujè enne paire dains sai djoénèe. Mains tot pai ïn côp, enne pétroleuse airrive ès grands tyaitre, et peus po n'pe écâchaie ct'effant, elle veut s'râtaie.. Chu lai yaice vôs saites que les pétroleuses ne f'sant pe çou qu'elles v'lant. Lâmoi, ctée-ci é c'mencie pai ollaie è gâtche contre lai fontaine, que l'é renvie è drète chu lou moncé de nadge di Djeanfoutre. Elle é péssè â traivie et peus elle s'ât airrâtèe dains lou tieutchi. El en é paitchi ïn grôs monsieur que breuillait " Laivoûsqu'elle ât cte ptéte murie qu'i l'étranlye ! " Et peu senne bélle Maidaime que se frouttait l'étcheûne en diaint " Oye voi ! Ce qu'i ai t'aivu paivou " Lou Monsieur vïnt vés moi et peus me dit " Laivoûsqu'èlle ât c'te vormeune ? At-ce que ç'ât è vôs ? - Mains mon poûere hanne, qu'i lu ai dit, moi, è mon aidge, aivoi des effants dïnnai, vos n'y étes pe ! "

    È fât vôs dire qu'en aittendaint i aivôs endyainnaè l'Albain dains lai tiaive et peus qu'i aivôs franmè lai pôtche è ché. Ces poûeres dgens n'aint aivu ran d'âtre è faire que de tieuri dous tchouvâs po tirie lai pétroleuse de lai et peus de lai faire è réporaie. Mains lou pus pé, ç'ât l'aiffaire di cro de mieûle.

    I étôs che sôle de yos aivisâles qu'i les aivôs botès dains lou poiye daivô des livres de mairtyottes. " Vïns vôre, que dit lou Patrick, c'tée-ci ce qu'elle ât bèlle ! ç'ât enne fanne tote gnue que naidge dains lai mée bieuse. - Ce n'ât pe pôssibye. Demainde è lai mémé. - At-ce que te sais naidgie, mémé ? - De mon temps, qu'i lu ai dit, les diaichottes félïnt yot trossé sains piedre yot temps è se trempaie dains l'âve. - Te vois, que dit l'Albain. Mains les boûebes, çoulai sait nadgie sains aivoi aippris. - Te n'és qu'ïn mentou, que fait lou Patrick, te ne sais pe naidgie. - I ne sais pe ? Eh bïn vïns vôre, benêt !

    Les voili paitchi. I ne m'en seus pe bèyie vâdge, et peus i étôs bïn contente d'étre ïn pô trantyille. Â bout d'ïn môment i entends tyétyun que m'aippeule d'vaint l'hôtâ " Climène, Climène, dépadjie-vôs ! " I prends mes tchaimbes chu mon cô et peus qu'ât-ce qu'i vois ? lou maire que tirait l'Albain pai l'araye, et peus tyé Albain ? I ne lou recognâchôs pe, tot purant, tot noi, et peus que sentait âchi métchaint que lou diâle.

    " Mon Dûe, mon Dûe, qu'ât-ce qu'èls aint r'fait ?

- È vôs fât putôt les condure è Saint-Ilie, que me dit lou maire, fidyurie-vôs qu'i étôs d'vaint l'hôtâ, i vois vos dous bessenots qu'aippreutchant de not' cro de mieûle, yun des dous, mains i ne sairôs dire louqué, que dit : yun, dous, trâs ! et peus que se tchaimpe dedains. Çoulai é fait ïn grôs piouffait, l'âtre é breuillie " â secouè " et peus pai tchaince i seus airrivè, sains çoulai c'te p'tét mourmoutyu était nayie. Vôs n'èz pus qu'è lou laivaie, lou rétchâdaie et peus lu adminichtraie yenne de ces revortchies qu'è s'en révije djunqu'è lai fïn de ses djoués. Aidûe ! "

    Et peus tyu qu'é laivè, pannè, rétchâdè et peus roûetenè c'te p'tét poûe ? ç'ât lai Climène, c'ment todje. Mais i y sondge, Madeleinne, i veus écrire ïn livre chu lou piaîji d'étre riere-grant-mére. Vôs peûtes étre chûre que çoulai porrait se vendre !

    Tiaind qu'vôs léchites lou vâ di Rahin po s'diridgie vés lou michtériou et tchairmou câre des Mille Etaings, è vôs fât tranvoichie totes les vèlattes di grant v'laidge de Fresse. Les hôtâs sont éguègu'lès dains lai voidjou et chu les côtes, en l'aiv'neutche d'lai rive des bôs sains fïn. Poitchot les grietous foiyards, les noires fuattes, sannant aivâlaie vés les tchaimpois, laivoù c'que résounant les campaines des p'tétes vaitches vosgiennes. L'aipaîj'ment de ci yûe, ïn pô rébiè, ât dampie troubyè pai lou faimilie traiyïn des raîsses.

    Pouètchaint, dains lou temps, totes les mâjons brond'nïnt c'ment des bessons ; è y aivait ciro tot pien de djûenence et d'émeû. Les dgens aivïnt essartè enson les crâts po écrâchaie yot butïn : ç'ât dïnnai qu'lou v'laidge di Plainot s'était conchtrut li-dchu, daivô ses bèlles vaitch'ries, sai mérerie, son môtie et peus son écôle, bïn chur.

    Ah, c'te siéjainne écôle, daivô ses roudges tieles, ses rôsies qu'embâmïnt d'vaint l'heus, son poiye bïn éçhairi pai de hâtes f'nétres et rempiâchu de braives afaints !... Lai maitrâsse aivait inchtrut doûes dgeurnâtions de montaignons, mains mit'naint èlle diait aidûe è tos ces dgens, pouèch'que l'houre d'lai r'tréte aivait soinnè po lie.

    Ç'ât ïn djûene rédgent qu'ât v'ni de Pairis po lai rempiaicie. È f'sait ïn pô lou tchoûeré en raivoétaint son leudg'ment sains éyètrichitè, sains poye de bains. Lou mére l'é trovè renfrognou et po les poirents des éyeuves, c'était ïn p'tét fignolou. Et peus èl aivait nom " Guillaume ", c'ment c'te trûerie de Kaiser !

    Dains son métie çoli tchem'nait bïn endrait ; è f'sait âchi des éffoûes po s'aivéjie en lai montaigne. Mains l'huvie aippreutchait et çoli l'épaivurait ïn pô. Tiaind qu'èl é èc'mencie è dgealaie du, èl ât dev'ni mailaite, è n'poyait pus çhiôçhaie è câse de " l'asthme ", c'ment qu'an diait. Dâli lou médicïn l'é envie dains enne mâjon de saintè, et peus aiprès èl é tchaindgie de câre, èl ât paitchi dains lai sen de Marseille.

    Encheûte an é vu débartçhaie enne baîchatte bïn aibiéchainne, qu'vignait d'lai Bretagne et qu'aivait non " Rozen ". Èlle était dyèe et ne f'sait pouè lai mijoûerèe. Èlle allait v'lantie ès lôvres dains les férmes et tchaintait c'ment ïn rossignolat. Et peus èlle emmoinnait s'vent les afaints détieuvri lai naiture, les çhiôs, les roétchèts, les bétottes, les oûejés… D'ci côp, les dgens lai dépeûtïnt ïn pô : ès dyïnt qu'èlle f'sait è piedre yot temps ès éyeuves.

    Èlle aivait léchie d'lai sen de Quimper son djûene fiaincie, dâli èlle poétchait enne baigue daivô ïn tot bé rubis en ûe (= ovale), eûffri pai son aimoérou. Mains voili qu'â fûe d'lai Sïnt Djean c'te baigue s'ât trovèe predjue, mâgrè totes les boènnes v'lantès po lai r'tieuri dains les ceindres et dains les alentoués, ran ! Niun n'é poyu compâre c'ment qu'èlle s'était évadnèe. Rozen en aivait brâment grandô et èlle ât aivu bïn aîje de r'paitchi è Quimper po les vacainces. D' lai-vâs èlle é graiy'nè â mére qu'èlle s'était mairièe et qu'èlle cheûyait son hanne qu'allait â Canada po son métie.

    Dâli ïn trâjieme maître d'écôle, lou chir Contal, é pris lou tch'mïn di Plainot. C'côp-ci c'était ïn boûebe d'ïn v'laidge â long qu'airrivait daivô sai fanne est tyaitre fés. C'tés-ci étïnt de sâcrès apchars, que chmarotsïnt dains les voirdgies et que loiyïnt des tiaisses en lai quoûe des tchïns. Les câtaines aint r'cmencie è dépeûtaie, pouèch'que sai fanne poétchait des vétures trou coétchattes, trou mirgodlèes. Èlles breut'nïnt âchi qu'lou chir Contal bracoénait poi-côps les yievres dains lou Mont de Vanes.

    È n'en tchât, lou rédgent, qu'était ïn bon vétçhaint, é botè chu pies enne féte po lou 14 de djuyèt, que mairtçhait ach'bïn lai fïn de l'onnaie d'écôle. Èl ât v'ni brâment d'monde et les dgens étïnt raivis. En lai fïn les harmonicas aint fait dainsie djoyous'ment tote l'aissembyèe, et lai fanne di maître youquait âchi, daivô sai loidgiere roube biaintche et roudge.

    Lou soi, lou chir Contal s'ât aittairdgi po rédure et nenttayie lou poiye…

    Lou djoué d'aiprés sai fanne s'ât évoiyie prou taîd : son hanne n'était pouè tchie yos. Èlle é craiyu qu'è regu'nait dains lou v'laidge, mains nian ! Niun ne l'aivait vu dâs lai vaye â soi ! Bïntôt lou mére é aipp'lè les dgendârmes, an l'é tieuri dains les bôs, les raivïns, les roétchèts et les bressons, an é fait des baittûes dains les côtes : ran !

    Mains quéques djoués aiprés, ïn boirdgie d'enne férme éloingnie ât v'ni tot r'virie taquaie tchie lou mére. Èl aivait r'cognu lai dyïmbarde di rédgent pairvé enne toérbiere ; en raivoétaint d'dains, èl é trovè lou coûe di chir Contal, roide et biève !

    Les dgendârmes, lou djudge di tribunâ aint dit dampie qu'lai moûe était lai cheûte d'enne airrâte di tiûere. Mains les landyes aint tchem'nè di temps des lôvres de l'huvie… Lou banvaîd, lu, se cajait : çât lu qu'aivait fait lou premie conchtat, mains è n'répondjait pouè ès d'maindes des baidgèlles que v'lïnt en saivoi d'pus.

    Pouètchaint sai fanne n'é pouè poyu s'empâtchie d'bèyie son ch'crèt ès ses véjïnnes : tiaind qu'lou banvaîd s'était aippreutchie di moûe-coûe, èl aivait tot d'cheûte r'mairtçhè â doiyat di maître d'écôle enne baigue que raimoiyait : èlle était tote pairie è c'tée qu'aivait predjue Rozen, daivô lou meinme grôs rubis en ûe !

    Lou temps et les sâjons aint tçhissie chu les bôs et les tchaimpois d'lai montaigne. Les djûenes sont paitchis vés les vèlles aivâ, les véyes sont moûes, lai cadje é pô è pô envôj'nè les roétchèts di Plainot et mit'naint les aibres aillondgeant yos brainces en d'chu les rûenes des hôtâs. La mâjon d'écôle ât todje li, veûde et muatte dains ses seuv'nis, daivô sai couè envâyie d'hierbes savaidges et de bot'nies. Voili grant qu'èlle n'é pouè r'ci d'afaints, mains niun n'en é lai grie.

    An m'é dit que sai çhôjure ât aivu ïn sôlâdg'ment po tus…